Donostia, Gipuzkoako hiriburua, Kantauri itsasoko kostaldean dago eta hiri erakargarria da.
Zerbitzu-hiria, 190.000 biztanle ditu eta jarduera turistiko handia du.
Hiri kulturala, Kursaal jauregiko auditoriumaren, Victoria Eugenia antzokiaren eta San Telmo eta Chillida-Leku museoen inguruan biltzen dira, batez ere, kultura jarduerak; eta antolatzen dituen hainbat ekitaldik nazioarteko sona dute, esaterako: Zinemaldiak, Jazzaldiak, Musika Hamabostaldiak zein Fantasiazko eta Beldurrezko Zinemaren Asteak.
Hiri modernoa, oinezkoentzako gune zabalez eta bidegorri luzeez gain, zentro teknologikoen sarea, unibertsitateak eta biltzar-jauregia ditu.
Donostiak dituen ezaugarriak, hirikoak zein sozialak, potentzial garrantzitsua dira Tabakaleraren proiekturako.
Gipuzkoa Euskadiko lurralde historikoetako bat da.
2.000 km2-ko azalera du eta udalerri industrialez, baserri bakartuz betetako landa-inguruz eta arrantza-portu atseginez dago osatua.
Gipuzkoak ehun industrial garrantzitsua du. Enpresa gehienak txikiak edo ertainak dira, eta nazioartekotze handia inguruan duten sustraitze sakonarekin bateratzen dute.
Gipuzkoan sektore teknologikoki punta-puntakoak eta berritzaileak daude, eta kooperatiben eredua oso hedatuta dago.
Gipuzkoarekin batera, Araba eta Bizkaiko lurralde historikoek Euskal Autonomia Erkidegoa osatzen dute. Vitoria-Gasteiz (EAEko hiriburua) eta Bilbo (industria eta finantza-zentro nagusia) dira probintzia horietako hiriburuak.
2.128.000 biztanlerekin, Espainiako estatuan autogobernu maila berezia du eta erakunde propioak ditu; hala nola, Eusko Jaurlaritza, Eusko Legebiltzarra eta foru-aldundiak.
Hiru lurralde horiek Euskal Herria osatzen dute, Nafarroarekin, Lapurdirekin, Zuberoarekin eta Nafarroa Beherearekin batera. Lotura historikoak eta kulturalak dituzte; bereziki hizkuntza, euskara.
Euskal Herrian hainbat kultur ekipamendu dago, adibidez: Guggenheim eta Arte Eder museoak Bilbon, Artium Gasteizen, Chillida-Leku eta San Telmo Gipuzkoan, Altzuzako (Nafarroa) Oteiza museoa eta Baionako Euskal Museoa.
