Tabakalerak atea zabaldu dio munduko film laburren jaialdirik garrantzitsuenetako bati: Clermont-Ferrand Nazioarteko Zinemaldiari. Otsailaren 26tik martxoaren 1era jaialdiko Labo saileko film labur guztiak proiektatuko dira Tabakaleran eta topaketak eta eztabaidak antolatuko dira.

Clermont-Ferrand jaialdiko Labo saila sorkuntza esperimentalari eskainia dago. Bertan aurkezten dira proposamenik harrigarrienak eta ikuspuntu ausart eta berritzaileenak. Clermont-Ferrand jaialdiaren eta Tabakaleraren arteko elkarlanari esker Labo sailean aurkeztuko diren film guztiak Donostian ikusteko aukera izango da: guztira, 17 herrialdetako 42 film. Ekimenaren osagarri gisa, topaketak eta eztabaidak ere izango dira film laburren eta zinemaren inguruan.